CINEDAYS награди

06-11-2019
in Category: Вести
CINEDAYS награди

CINEDAYS награди

На 18. издание на CINEDAYS беа доделени наградите:

Најдобар филм, награда ЗЛАТНА ЅВЕЗДА за филмот ЛИЛИJAН, во режија на Андреас Хорват
Приказна за едно необично, обземачко патување, врамена хируршки прецизно. Приказ на суровоста на природата, минувајќи низ браздите на една скршена земја која не изгледа така оддалеку.

Најдобра режија, ОРАЈ на Мехмет Акиф Бујукаталеј
Бескомпромисен интимен портрет на една помалку позната современа европска реалност, со маестрално изведена драматургија, низ очите на еден комплексен лик кој е во потрага по спасение.

Награда за Најдобро сценарио, СИНА ЅВЕЗДА за филмот ДУШИЧКА, во режија на Мунија Медур
Трогателен приказ за ужасите на екстремизмот, преку моќно и суптилно сценарио, кое нѐ води од деликатна транзиција на адолесценција во зрелост до најавен масакр, притоа сеедно успевајќи да заврши со вистински бунт на надеж.

Посебно признание за Најдобра улога на Зејхун Демиров
За исклучителната изведба како главен лик во „ОРАЈ“.

Во селекцијата СинеБалкан награда „Златно сонце“ за најдобар филм доби филмот „Сестра“ во режија на Светла Цоцоркова, Бугарија.

Специјално признание за филмот „Куќата на агата“ во режија на Лендита Зекирај, Косово, Хрватска, Франција, Албанија.

Награда за Најдобра филмска музика на композиторот Михаил Новински за филмот „Со остар нож“ од Теодор Кун.

Награда за студентски филм – Жири: Сара Ферро, Дарко Набаков, Радован Петровиќ
„Бела соба“, режија Младен Станиќ

Наградата за студентски филм решивме да ја доделиме на краткометражниот „Бела соба“ во режија на Младен Станиќ од Академијата за драмски уметности во Загреб, Хрватска. Во овој филм режисерот има направено одлична рамнотежа помеѓу идејата што ја имал и достапните ресурси за нејзина реализација. Успева да ни раскаже една мала, интимна приказна за врската меѓу двајца браќа на многу суптилен и човечки начин.

Награда Young Cinema Award од жирито на Џифони филм фестивал за филмот „Душичка“, на Моуниа Медоур
Наградата на младинското жири ја доделуваме за филмот што на експлозивен и суров начин ја претставува сликата на немирот и опресијата на младата жена во спојот на исламското конзервативното општество и современото општество каде што како светла точка се јавува непокорот на новите генерации и надежта за некоја подобра иднина на целата заедница.
Во филмот „Душичка“ (Papicha) препознавме една младинска бунтовност против закоравените традиции и сфаќања, водена од главниот лик Неџма, осумнаесетгодишна студентка, која со решителност и цврст став сака да му покаже на општеството дека светот се менува и дека на новите генерации мора да им се даде избор, нивни избор за начин на живот.